img_5324-k24.septembrī Latgolā nūtyka vīns cīš eipašs i, munupruot, sirsneigs pasuokums – Nikodema Rancāna bolvys padūšona lobuokajim Latgolys pedagogim. Uzaicynuojumu vadeit ituo gods bolvys padūšonys ceremoneju skaitu par lelu pagūdynuojumu i ar pateiceibu pījiemu tū.

Pyrmkuort, pats sovulaik asu īsapaziņs ar Nikodema darbeibu i augstai vierteju kai juo, tai cytu Latgolys viesturiskūs personeibu īguļdejumu.

Ūtrkuort, beju prīceigs bolvys nominantu i ari sajiemieju vydā redzēt vairuokus maņ jau labi zynomus ļauds, it eipaši poša klasis audzynuotuoju Ainu Zariņu nu Ezernīku vydsškolys. Myusu dīnuos taišni školuotuoji ir kulturys tradiceju i pamatvierteibu sorgi, dūmoju, ka itei bolva ļaun apzynuot i nūviertēt školuotuoju miļzeigū īguļdejumu Latgolys i vysys Latvejis styprynuošonā.

Beju kluot īprīškejūs diveju godu bolvys padūšonys pasuokumūs i organizatoriskais leimiņs vysod ir bejs augsts, par kū paļdis juosoka ari Ilgai Šuplinskai i vysai Latgalīšu kulturys bīdreibai.

Pīsavīnoju režisora Viestura Kairiša saceitajam pasuokuma laikā:
“Itei ir svareiguokuo bolva Latgolā, deļ tuo ka školuotuojus es radzu kai varūņus, kas gondreiž voi ar partizanu metodem vuica latgaliskū školā. Navajag beitīs, gaideit Izgleiteibys i zynuotnis ministrejis lāmumu, kab školuos vuiceitu latgalīšu volūdu. Eiropys Savīneibā latgalīšu volūda teik atzeita par apdraudātu volūdu. Es ari dažreiz dūmoju, deļ kuo tys maņ ir vajadzeigs, tok tod es atguodoju Franča Trasuna vuordus – “Varai pīder laiceiba, taisneibai – myužeiba!”, i taisneiba ir tei, ka Latgolā ir juorunoj latgaliski.”

Vairuok informacejis: http://rezeknesnovads.lv/godinati-latgales-izcilakie-skolo…/